Devi Aparadha Kshamapana Stotram

न मन्त्रं नो यन्त्रं तदपि च न जाने स्तुतिमहो न चाह्वानं ध्यानं तदपि च न जाने स्तुतिकथाः। न जाने मुद्रास्ते तदपि च न जाने विलपनं परं जाने मातस्त्वदनुसरणं क्लेशहरणम्

na mantraṃ no yantraṃ tad api ca na jāne stutim aho na cāhvānaṃ dhyānaṃ tad api ca na jāne stutikathāḥ | na jāne mudrās te tad api ca na jāne vilapanaṃ paraṃ jāne mātas tvad anusaraṇaṃ kleśaharaṇam

॥ १ ॥

विधेरज्ञानेन द्रविणविरहेणालसतया विधेयाशक्यत्वात्तव चरणयोर्या च्युतिरभूत्। तदेतत्क्षन्तव्यं जननि सकलोद्धारिणि शिवे कुपुत्रो जायेत क्वचिदपि कुमाता न भवति

vidher ajñānena draviṇavirahenālasatayā vidheyāśakyatvāt tava caraṇayor yā cyutir abhūt | tad etat kṣantavyaṃ janani sakaloddhāriṇi śive kuputro jāyeta kvacid api kumātā na bhavati

॥ २ ॥

पृथिव्यां पुत्रास्ते जननि बहवः सन्ति सरलाः परं तेषां मध्ये विरलतरलोऽहं तव सुतः। मदीयोऽयं त्यागः समुचितमिदं नो तव शिवे कुपुत्रो जायेत क्वचिदपि कुमाता न भवति

pṛthivyāṃ putrās te janani bahavaḥ santi saralāḥ paraṃ teṣāṃ madhye viralataralo'haṃ tava sutaḥ | madīyo'yaṃ tyāgaḥ samucitam idaṃ no tava śive kuputro jāyeta kvacid api kumātā na bhavati

॥ ३ ॥

जगन्मातर्मातस्तव चरणसेवा न रचिता न वा दत्तं देवि द्रविणमपि भूयस्तव मया। तथापि त्वं स्नेहं मयि निरुपमं यत्प्रकुरुषे कुपुत्रो जायेत क्वचिदपि कुमाता न भवति

jaganmātar mātas tava caraṇasevā na racitā na vā dattaṃ devi draviṇam api bhūyas tava mayā | tathāpi tvaṃ snehaṃ mayi nirupamaṃ yat prakuruṣe kuputro jāyeta kvacid api kumātā na bhavati

॥ ४ ॥

परित्यक्ता देवा विविधविधसेवाकुलतया मया पञ्चाशीतेरधिकमपनीते तु वयसि। इदानीं चेन्मातस्तव यदि कृपा नापि भविता निरालम्बो लम्बोदरजननि कं यामि शरणम्

parityaktā devā vividhavidhasevākulatayā mayā pañcāśīter adhikam apanīte tu vayasi | idānīṃ cen mātas tava yadi kṛpā nāpi bhavitā nirālambo lambodarajanani kaṃ yāmi śaraṇam

॥ ५ ॥

श्वपाको जल्पाको भवति मधुपाकोपमगिरा निरातङ्को रङ्को विहरति चिरं कोटिकनकैः। तवापर्णे कर्णे विशति मनुवर्णे फलमिदं जनः को जानीते जननि जपनीयं जपविधौ

śvapāko jalpāko bhavati madhupākopamagirā nirātaṅko raṅko viharati ciraṃ koṭikanakaiḥ | tavāparṇe karṇe viśati manuvarṇe phalam idaṃ janaḥ ko jānīte janani japanīyaṃ japavidhau

॥ ६ ॥

चिताभस्मालेपो गरलमशनं दिक्पटधरो जटाधारी कण्ठे भुजगपतिहारी पशुपतिः। कपाली भूतेशो भजति जगदीशैकपदवीं भवानि त्वत्पाणिग्रहणपरिपाटीफलमिदम्

citābhasmālepo garalam aśanaṃ dikpaṭadharo jaṭādhārī kaṇṭhe bhujagapatihārī paśupatiḥ | kapālī bhūteśo bhajati jagadīśaikapadavīṃ bhavāni tvatpāṇigrahaṇaparipāṭīphalam idam

॥ ७ ॥